كتبت*نضال شهاب*
متل اليوم اهل الجنوب واهل البقاع رجعوا عبلداتن ما معن الا كرامتن
وقفوا عبوابات مناطقن قبل ساعات وبس صارت الساعة 4الصبح مشيوا ليكحلوا عيونن ببلداتن المدمرة لانن عارفين انن رح يرجعوا يبنوها .
اه الساعة 6الصبح كانوا واقفين عركام منازلن عمبيلملموا الاشلاء بجباههم الشامخة .
اهل الجنوب اللي كانت تتقدملن كرتونة المعونة كانوا احيانًا يرفضوها لأنن مش محتاجين واحيانًا كانوا ياخدوها ويتقاسموها مع المعوزين من اهالي بلدات النزوح .
اه اهل الجنوب كانوا بمعظمن مستأجرين بيوت ب1000وب1500$ تركوها لاصحابها وهني دافعين 3اشهر و6اشهر سلف.
ورجعوا ليعيشو ببلداتن عالحجار والتراب
بلا كهربا وبلا مي وبلا ادنى مقومات الحياة،
رجعوا لأن عارفين انن بيستحقوا الحياة،
انن قادرين يرجعوا يبنو بيوتن ويرمموها
اهل الجنوب رجعوا يدفنوا الشه دا والودايع ويبرموا عالمفقودين
رجعوا يبرموا عن ارض ما كانوا بيبقلوا ابدًا انو تنسلب منن.
اهل الجنوب برجعتن عبلادن بعد دقايق من سري مفعول وقت وقف اطلاق النار ،
كانوا بقوافل العودة حاملين علم لبنان ، علم العزة والكرامة .
اهل الجنوب اللي دفعوا فاتورة ما الها تمن عن باقي اللبنانيين اتهمهم بعض اللبنانيين انن مش رح يرجعوا عبلداتن انن رح يضلوا بالبيوت والمدارس رح يستحلوها …
ولو … حدا بيستحل غرفة بمدرسة وهو عندو بيت وارزاق بحجم مدرسة ؟
اه في نازحين قعدوا بالمدارس وعانوا من صعوبات النزوح بس ما تذمروا ابدًا
وكانوا عطول يردوا على اللي كانو بدن يصطادو بالمي العكرة ويجاوبوا محتسبين ومصبرين "نحن فدا اهلنا بفلسطين ،قدمنا اغلى ما عنا وبعدنا قادرين نقدم"
كانوا بيعرفوا قيمة وقوف الجار حد جاروا كانوا بيعرفو قيمة الوقوف بجانب نصرة المظلوم…
قدموا لفلسطين اغلى ما عندن وكانوا وبعدن مستعدين يقدموا بلا منة وبلا ما ينتظروا اي رد للجميل .
السنة الماضية متل اليوم رجعوا اهل الجنوب عبلداتن لملموا جراحن اللي ما كان اي حدا غيرن بيقدر يحملها
دفنوا ودائعهم من شه دا ومتوفين وبلشوا يردوا الواجب للأحرار اللي ساندوهن بمحنتن ببلدات النزوح صاروا يبعتولن الهدايا اللي بيقدروا عليها .
متل اليوم اعطوا اهل الجنوب ومتل عادتهن دروس بالكرامة والوطنية والعزة والإباء…
كانوا وبعدن قادرين عالعطاء
اهل الجنوب سافروا واشتغلوا ورجعوا وعمروا بلداتن وعلموا اولادن وسلحوهن بالعلم والمعرفة قبل السلاح ، لأنن بيعرفوا انو سلاح العلم اهم من سلاح الحرب.
اهل الجنوب ما هاجروا وما هجروا وطنن
وما بيهجروه لأنن بيعرفوا انه بحاجتن
جنوب لبنان واهله هني نبض الوطن ، ما بتنهكن الجراح وما بتركعن الاعتداءات وما بتقلل من عزيمتن مشقات الحرب والنزوح…
بيعرفوا كتير منيح انو كل اللي صار وعميصير معن ما بيزيدن الا عزيمة واصرار وتحدي …وتأدية للواجب اتجاه اهلن وجيرانن …
